Der Gugger isch vor Alters es gizigs Wib gsi , e rechti Batzechlimmere, und het mit Wegge ghandlet. Chunnt einisch äsen es arms hungrigs Büebli zuen ere und wott eren es Weggli abchaufe.

„Wie tür so nes Weggli?" frogt er.

„He, seit si, so vil Chrüzer chost's as i mag uf di blutt Hand glegge."

„S'söll gälte, seit s'Büebli und längt si Hand dar. Aber do het de Gitznäper nie welle fertig werde mit dem Chrüzerlegge; wo nume no-n es munzigs Blätzli vo der Hand füre güggelet het , do het si no gwüsst e Chrüzer ine z'zwänge und het das Büebli gar grusam gängstet und glangwilet, bis em am End aller Ende d'Geduld afen usgangen ist.

„Flüg uf und rüef Guggu ! " seit's i sim Hunger und Verdruss — und bim Wätterli! chum het's es dusse, sen isch das gizig Wib en Gugger worde und isch en Gugger blibe bis hütiges Tags.

Quelle: Sutermeister, Otto: Kinder- und Hausmärchen aus der Schweiz

(Mundartlich nach Rochholz Alemannisches Kinderlied S. 78, und Lütolf Sagen S. 355.)

Eingelesen von der Mutabor Märchenstiftung auf www.maerchenstiftung.ch