Vo re Häx u ihrem Chrott

E Frau het all Sundi gchüechlet; aber dr Ma het afe dr Gring gschüttlet, vowäge är hätti gärn gwüsst, wie sie das achehri. Mähl, jo, Mähl hätti sie gnue gha; aber Eier, das isch angerlei, we d’Hüehner scho läng Stücks nüt meh gleit hei!

Du het er dänkt, däm müss er derhingerecho. Amene Sundi am Morge het er zur Frau gseit, hüt well er au wider einisch z’Chile; är sig scho lang nüt meh gsi. Drufabe het er si gsundiget un isch furt oder het emel dergliche to; nid wit vom Hus isch er wider zrugg u hinger d’Holzbige. Gli druf isch d'Frau us der Chuchi cho. Sie het es hasligs Rüetli i der Hang gha. Sie isch blibe stoh u het desumeglueget. Derno isch sie i Chällerhals abe; do isch e gosse Chrot gsi. Mit em haslige Rüetli het si dr Chrott zwickt; du het er es Ei gleit, u so mängs Mol wie sie ne zwickt het, so mängs Ei het er gleit.

Du het dr Ma gnue gwüsst. Är isch zur Frau u et ere seit, är möcht au lehre häxe. Das chönn er scho, het sie-n-ihm seit, wen er dr Wille derzue heig, jetzt müsse er afe nun Morge hingerenangere d’Häng nüt wäsche. Wo nün Tag si ume gsi, het d’Frau gseit, jetzt müess er mit er uf e Mischthufe u re nohesäge, was si sägi. Du het sie seit: „Jetzt laufe mer uf em Mischt.“ Dr Ma: „Jetzt laufe mer uf em Mischt.“ Derno fahrt si witer: „Mir verlaugne üse Herr Jesus Chrischt.“ Aber jetzte, was geiht; dodüre het är nid welle u het d’Frau abgschlage, um ere s’Häxe z’vertriebe.

M. Sooder, Sagen aus Rohrbach, Huttwil 1929

Eingelesen von der Mutabor Märchenstiftung auf www.maerchenstiftung.ch.