Mer sy sälbmol afe ne Johr us der Schuel gsi. Am e Karfrytig, ’s isch e sunnige, prächtige Früehligstag gsi, sy eusere drü Meitli d’Winkelgass uf gspaziert; mer hei uf ’s Ramschteschloss welle. Ob der Holle isch e Hübeli; es syg dort in der Ritterzyt e Galge gstande. Wo mer zu däm Hübeli cho sy, stönde dort drei wunderschöni Pantoffle, wie mer noh nie keini gseh hei; aber keine-n-isch glych gsi wie der ander. In der Sunne hei si in alle Farbe glänzt und gfunklet, wie wenn si us luter Chrällele were. Mer hei die Pantoffle lang bitrachtet, aber se nit gitrout a z’rüehre. Dernoh sy mer e Stückli wyter gloffe, hei vo dene Pantoffle brichtet und afo wärweise, öb mer se-n-ächt doch hätte selle neh. Mer sy wieder zrugg, hei aber keini Pantoffle meh gseh.

Quelle: G. Müller/P. Suter, Sagen aus Baselland, Liestal 1939.

Eingelesen von der Mutabor Märchenstiftung, www.maerchenstiftung.ch