An Oberfäld häin Älper Griidhänsels Chalbelli verloren; si häi gsüöechd und niena niid funden.
Hänsel hed Bschäid uberchun. Är ischd a d'Alp und hed sälber gsüöechd ung gsüöechd, uf Bielen, hindrem Horen, an Oberfäld; wäder Hüüd no Haar vu siim Chalbelli ischd virha chun.
Düöe ischd er uber en Briinig zem Tirlinarr. Där hed nummen e Tscholle glached ung gsäid, das Chalb siigi an arra andren Alp und siigi zwäg; de d'Nacht sigi's under enem Spiicher.
Griidhänsel ischd häin. Ds ander Vee ischd hänen im Vorsess gsiin. Är ischd umhi z'Alp und hed gmäind, das siigi gwess an Oberfäld, läbends old tots; aber vum Chalbelli hed er umhi niid funden. Düöe ischd er uber e Sattel und abhi gägen Hinderburg und vun da gägen Axalp. Und richtig! Under nem Spiicher ischd sis Chalbelli gsiin, gsund und zwäg, ung gfäld hed im niid em Brosmen.
Ägerre Jos ischd ibelmegenda gsiin; ganz us em Gwand ischd er ghiid. Är ischd zem Tirlinarr und hed im vu siim Groiggi bbrichted. Där hed im gsäid, är häigi im Waald es Wasserchalb trüühen; das mangleti vun im. Jos hed Tee uberchun, und nid lang isch'sch ggangen, hed er Stäg uw Wäg chennem bbrüüchen und ischd alla zwäg worden.
Es Mal ischd Griidhänsel wägen em Rind bim Tirlinarr gsiin, und där hed im Ruschtig ggräched. Uf ds Mal hed dr Tirlinarr afa-r-richellen, etz siigi's handtli ggangen; äs siigi gad äina bim Chriesen embrinha ghiid; aber är häigi bloss es Ärmli gwirsed.
Hänsel ischd stäiwurfs wiit vum Hüüs gsiin; düöe ischd em em Büöeb chu z'loiffen, är mangleti de Dokter, Dratt siigi bim Chriesen vun dr Läitre ghiid und häigi es Ärmli gwirsed.
Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.
Eingelesen von der Mutabor Märchenstiftung auf www.maerchenstiftung.ch.