En Hirter hed wiit embrüüf in enem Vorsess ghirted; neemme suschd ischd um d'Wäga gsiin.

Äis Tags ischd es Zwäärgli chun, es chliis hends Mandelli. Äs hed ghirted ung gholzed, ganz ellenggen; äs hed z'dicke gläid ung gchääsled und ischd mid dem Vee z'Träihi gfaaren, und am Aben isch'sch näben Hirter i d'Näschterren ge-l-ligen. Alls isch ggangen wee an enem Schneerli.

Dr Hirter wän äis gäären häin, äs hed ne tüüchd, ds Zwäärgli chennti ellenggen dem Vee Raad töön, und är hed's gfräägd, ob's im zwider wään, e Tag old zween ellengge z'siin.

Ds Zwäärgli hed zfridna Bschäid ggän; aber äis dingi's ma an, we's üri old we's üre siigi, sell er den nid uf is zellen.

Dr Hirter ischd no gliiche Tags häin.

Am Abein hed ds Wätter gcheerd. Uber d'Flee hed's d'Biisen inhagreerd; äs hed afa junsenen ung guren ung Gwäächti triiben. Äin Gureten, äi Stoibbeten hed dee ander gjagd. Im Darseen hed's gliich no Schnee dargreerrd, da Gwäächti triben und dert dem Boden abarra gwischd.

Dr Hirter hed afa chummren. Aber bald ischd er üüsbsunna gsiin und hed nid lang gsöögelled und ischd zwäg, fir z'löögen, ob im Vorsess alls in dr Ornig siigi. Är ischd zer Schiir chun und hed d'Gadetir üüfgschrissen; es paar Hoitleni sii gftanden; dee andre sii glägen und häi gmalen, und alli häin im d'Grinda zöögcheerd und häin niid anders ghäben.

Döö ischd vum Hüüsli naha ds Zwäärgli chun; aber das ischd nid gööd Täggels gsiin und hed gulliideged und däliged, warfir är chemi. Äs jüri und siigi jüren; aber äs üri nid und siigi nid üren. Numme we's güred hätti uw wän üre gsiin, hätt' er meesse chun; den Ürwätter, de Feen, dä schiichi är, där schläiji de Cheenen i ds Üüter, das si vun dr Milch chemen und trochni im ds Marg im Bäinen.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.