Am leschten Aben uf Bielen, vor em Virerfaaren embrin uf ds Blatti, isch'sch en gliichlaga Brüüch gsiin. Wär zlescht ischd vum Tagwäidren old suschd ischd häichun, ischd Blattistier worden. O, das hed esie es Bbriel ggän! Ma hätti's hindrem Horem mege gheerren: „Dr Blattistier! Dr Blattistier! Är chunnd! Är chunnd!"

Gwoondlian siin äben die a d'Räie chun, wa häim miesse tagwäidren. Hinna ischd dAtzig geng gringi; im Läger und in dr Zemi isch'sch bis uf em Boden abgetzts; ds Vee wäided obsi und chunnd i d'Wildi, und die, wa Tüür häin, häi z'tien mid Werren und Abschalten bis i d'Nacht inhi.

Äs ischd geng am Alpvogt gsiin, d'Älper laa zsäme z'chun, fir ditz old das üüszmachen. Äs isch'sch Brüüch gsiin, das er an enem Aben vor d'Hitte ggangen ischd um bbrieled hed: „Züöeha! Züöeha! Züöeha!" De sii d'Älper chun und häin afa-r-raaten.

Wägem Virerfaaren uf ds Blatti embrin hed menga im Stillen afa-r-rächnen und uberschlaanr „An däm und däm Tag müöes das und das Ganzem tagwäidren; d'Räien wän an iis. Das wän gad dr lescht Tag vor em Abfaaren. Ä' ä', näin, fir dä Tag bin i nid; äs brüüchd niemmen vun iis Blattistier z'siin!" Gsäid hed das egghäina, aber täichd hed's en iedra, und en iedra hed gwerrd mid Henden und Fiessen, fir nid Blattistier z'wärden.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.