Zum Chehrumtürli!

Es Fraueli het nid a d’Frau Faschte glaubt. Das sig nüt, het es bhauptet, emel es heig se no nie gseh.

Das het eine ghört. Dä heig dänkt: Die will i jetze z’förchte mache. ’s Spöttle vergeiht ere sicher. Bim Tusigsdiller, was gilt’s? Die söll no a d’Frau Faschte glaube.

Äs isch amene Chiltobe gsi. Das Fraueli het gspunne. Du isch ihm äine a ‘s Pfäischter go ge chlopfe. ’s Fraueli luegt uf. E Spuele Garn flügt ihe! ‘s Liecht verlöscht!

Sider het das Fraueli a d’Frau Faschte glaubt: Jo, mi söll dere nid spotte; sie sig zum Chehrumtürli cho. Gä wie liecht sig sie ungsinnet do. Sie chönn erzelle, was sie sälber erläbt heig.

M. Sooder, Sagen aus Rohrbach, Huttwil 1929

Eingelesen von der Mutabor Märchenstiftung auf www.maerchenstiftung.ch.