Peterli sitzd im Fiirhüüs uf em Boden und täibelled; är täti gäärem büübellen, und d'Müöetter wolld's nid han.

„Los", säid d'Müöetter züöe-n-im, „äs gäid, bis i dr Rüöessgampelle-r-rieffen. Äs wän dr wirser, düü hertischd üüf zwinggrindellen."

„ D'Rüöessgampellen? "

„Ja, d'Rüöessgampellen, die ischd uf dr Rüöessdili embrüüf; we d'Chind nid folgen, chunnd si abha i d'Chuchi und nimmd sa. Wie nen alti wieschti Grossen isch schi. Wäischd ds Gsatzli vun arra?

Rüöessgampellen uf dr Dili

hed Oige wien es Fili,

en Grind wie nen Härpfelchorb

um Bbäin gad wie ne Sägeseworb."

An dr Gassen säge s' das Gsatzli anders:

„D'Röössgampellen uf dr Dili

hed Oige wie es Fili,

es Müül wie ne Schlusselchorb,

e Buggel wie nem Bogechorb,

hed roschtig Zeend

um blöötig Hend

und frissd alli beesi Chind,

wa nid loibi sind."

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.