Dr Breitmatter

E Schnieder isch i d’Breitmatt uf d’Stör gange; du si-n-ihm bi dr Altburg d’Jaghüng vom Breitmatter ebcho u gli druf dr Breitmatter sälber. Dr Schnieder het ihm d’Zit bote; aber dä het nid umegluegt; das isch em Schnieder gar gspässig vorcho.

I dr Breitmatt het me grad welle z’Morgen ässe. „Gang rüef em Vater“, säg es Meitli zumene Bueb. - „Jo, isch de dä nid go jage?“ frog dr Schnieder. „He, nei.“

„Das chunnt mir neue arig vor. I bin ihm doch grad bi dr Altburg bigägnet.“ Du lueg eis ’s angeren a; kes säg es Wort meh.

Äs isch i de drissger oder vierzger Johre gsi. Uf dr Huttelallmäng isch Milidär gsi. Viel Lüt hei zuegluegt. U Stäng si gsi wie a re Chilbi. Du isch eismols es Wätter cho; ’s het gschüttet wie mit Chüble. Aber im Stedtli het’s nüt gmacht; z’Ungerausel hei d’Lüt gheuet u mängs Fueder iheto u ke Tropf Rägen ubercho.

Sälb Chehr hei d’Lüt gseit‚ das Wätter heig dr Breitmatter gmacht, für de Lüte z’Leid z’wärche. Dr Breitmatter isch drum nid e sufere gsi.

Är het em Tüfel mit em eigete Bluet ungerschriebe gha. Wo-n-er isch chrank gsi, isch e vürnähme Her cho; dä het ihm dr Chopf umdräiht. Nom Tod isch er umecho. No hüt isch i dr Breitmatt e Stube vergänterlet, dass er nid usechömm. Aber einisch isch er ne doch use. E Chapuziner het nen aber ume chönne itue. Mi Vater het mer no erzellt, wie sie dr Chapuziner ire Schese greicht heige u dür s’ Dorf düre gsprängt sige, für em Geischt z’verwehre, Ungfel azstelle.

M. Sooder, Sagen aus Rohrbach, Huttwil 1929

 

Eingelesen von der Mutabor Märchenstiftung auf www.maerchenstiftung.ch.