Vom schwarze Ma uf em Lürligrot
Uf em Lürligrot isch’s unghüürig gsi. Johr für Johr het dr Hirt mit dr War Ungfell gha. Niemer het’s am Änd meh gwogt ufzzieh, u d’Bure hei im Azeiger lo usschriebe, sie suechen e bhärte Ma für ihri War uf em Lürligrot.
Dr Sami het's gwogt u si agmäldet. Är isch uf d’Weid ufzoge. Am Weidgatter isch e chohleschwarze Ma gstange. „Ale, Chohlebrönner, hie häre! Tue ’s Gatter uf!“ het ihn Sami abrüelet. Dä isch cho u het ufto. „Hü, rod di chli; bing a. Du hesch dr Zit. Du bisch ja hie deheime.“ Dr schwarz Ma het ohni Widerred gfolget u het bald do bald derthi müesse springe.
Z’Obe het dr Sami e Ziegermilch uf e Tisch gstellt; dr schwarz Ma isch bim Ofe bliebe stoh. Du het ihm Sami grüeft: „He do, chumm vüre. Du hesch brav gschaffet. Jetz chasch au ha.“ Du hei beid zsäme gässe. Ändtlige fot dr schwarz Ma a u seit: „Nimm e Pickel un e Schufle u chumm mit mer.“ „Jo», macht dr Sami, „jo, i chume; aber du geihscht vora.“
Du isch dr schwarz Ma vorus un uber d’Stägen ab i Chäller. Jetz was geiht? ’s Blatt het si dräiht; dr schwarz Ma het bösi Auge gmacht, mit em Finger uf ene Stell dütet u gseit: „Grab es Loch. E Stung hesch Zit. Bisch nid fertig, bisch verlore.“ Sami het dänkt: „Läbe lo oder dürecho. Äs isch jetz, was isch.“ Dermit het er afo grabe. Dr Schweiss isch von ihm abetropfet. D’Stung isch no nid ume gsi; du chunnt es ehrigs Häfeli u ne Zwilchsack voll Gäld vüre. Drü Mol het Sami e schwäri Burdi i d’Stuben uehetreit. Dr schwarz Ma het drei Hüfe gmacht. Demo het er zu Samin gseit: „Lue do! Dä Hufen isch für die arme Lüt, dä do dine u äine isch mine.“ J etz, was geiht! Sami schüttlet dr Gring u seit chäch: „Nei, dä Rung geiht’s angersch. Afe du hesch nüt meh nötig, u den arme Lüte will i sälber gäh“, grift mit beden Armen uber e Tisch u schrisst all drei Hüfe zuehe. Drufaben isch dr schwarz Ma plötzlich niene meh gsi.
Jetz hei die Buren e schöni, gsichereti Weid gha, dr Sami Gäld in alli Spiel; är isch eine vo de gröschte Bure worde.
M. Sooder, Sagen aus Rohrbach, Huttwil 1929
Eingelesen von der Mutabor Märchenstiftung auf www.maerchenstiftung.ch.