Am Giswyler Stock obä, in ärä Alp - i weiss bim äiker der Namä nimä - da isch einisch ä son äs chlys Mandli ini Hittä cho und hed vo dä Sennä ä chly Milch wellä; disi händ äm s gä. Uf das hi chunts mängisch und hed allig für dMilch bim Chäsä und Vehhiätä ghulfä. Aber dä chly Chrettler, dä heds besser megä als dui.

Enu, das Ding isch guäd gsy, dä chly Fetzel isch Tag für Tag cho, und Buirä hend ä lengär si meh Milch übercho, und wenn s hend miässä bärghäiwä, so isch ds chly Mandli eifach uisä gstandä, hed ä Steckä gnu und ds Häi vor em anä gjagt. Nur wenn de der Fehn cho isch, da heigs de sich nimä fürägla. — Ja, wissid är de nit, dass der Wind ihnä ds Marg i dä Bäinä trechnet?

Und duä isch einisch ä jungä Senn uf d Alp chon, und dä hed ai wellä im Bergmandli ä Streich spilä. Duä hends de i der Hittä ä Suiffitrog gha und dä isch de mid Lädä überdeckt gsy. Det druif isch de  allig das Mandli ghocket. Enu, das Ding isch guäd gsy: der jung Fink hed einisch, wo der Chly fort gsy isch, a äim Ort dursaget und nachhär mit Dräck wieder uberstrichä, dass mäs nid gmerkt hed. Am Abed chunt der Chly und setzt si wieder a diä Stell ufem Suiffitrog. Aber chuim isch är da gsässä, so plätschts und är ghyid i diä grai Suiffi abä. Duä hend alli afä lachä und hend ihri Fräid dra gha. Ds Mandli aber isch fort und isch dann niämeh cho.

Es Jahr druif aber isch dä jung Bursch am glychä Tag i der glychä Hittä ganz plötzli gstorbä. D Lit, wo derbiä gsy sind, hend gseid, äs syg äs chlys, fürigs Mandli erschinä und heig nur gseid: «Chul los, i muäss mit dier eppis redä!» und uf das hi syg är gstorbä.

Aus: C. Englert Faye, Von kleinen Leuten. 102 Zwergensagen, Feen und Fänggengeschichten aus der Schweiz, Bern 1937.

Eingelesen von der Mutabor Märchenstiftung auf www.maerchenstiftung.ch