D Zwärgleni sy frommi Lytleni gsyn. Desstwägen hei s viil meh chenne wan die gwehnlihe Lyt. Tifiger sy s gsyn u gmerkiger; sie hein o viil besser gsehn u gcheerd. U Chraft hein denn die Pefeni ghäben, dass däm niena nyd by choon ist! - Aber sie hein nid numman über alls gued gsehn u gcheerd; die hein o ds Näsi gwissd zbruuhen, dass nyd seliss erheerd worden ist! Wen im Winter anhi dChieh hein afaa chalbren, su heds den o ggään, dass dLyt under Malen eppa en Biestturta agreised hein. Aber nid über lang hei s denn das zobrist im Wätterhoren uehi gwissd, das eppas fir sie twäga wä. Biestturta hein de Zwärgleni grad es Breesi gääre ghäben, die hätt nes denn newa chennen! DTallyt hein das gwissd und hein ne ra gären es Aawärd innäbe gstellt. - Da hätte s eimmal o aber eis in em Huus fir z nachtnen en Biestturta uf e Tisch gstellti ghäben, wa s gcheeren es Zwärgli über zSummerloiba zueha und i ds Gengli inha träppellen. Där vergystig Hellsaata von em Wybli hed gmerkd, waran das s mu fählti, und ist angänds mit der Turta ids Ofeloch ynhi. Ds Zwärgli chunnd i dStuba und hed si no chlynder gmachd, wan das s scho sust is gsyn. U wien es si da no aso a ds Biistaal zuehi trickd, heds um ds Gotts Willen aghäben, sie seile mu es Schnäfi Biestturta gään. Aber was hein dLyt tan? Sie hei mu e gsottna Hääpel und es Aawärd magera Ziger aboten und hei sen glacht u gseid: was ihm o zSii chemi! von Biestturte wisse sie newan nyd.

Darmid heds Zwärgli gwissd, waran dass s ist! Uf der Tiirschwelle trääjd es si no eis um u seid: «Jer heid dTrywi o im Ofen u dUtrywi in der Stuben usa!»

Aus: C. Englert Faye, Von kleinen Leuten. 102 Zwergensagen, Feen und Fänggengeschichten aus der Schweiz, Bern 1937.

Eingelesen von der Mutabor Märchenstiftung auf www.maerchenstiftung.ch