Im a Wald ist a Kista gsi mit ama kostbara Schatz dry. D'Lüt händ zwor dervo gwüsst, wyl ma-n-aber albig gseit het, es hocki a fürchtigi Krott uf am Teckel, und wer de Schatz well kriaga, müess dia Krott dreimol abaschlaga, das erst- und d's zweitmol werd sie wider uffihoppa, und ma werdi derbei Saha g'seha-n-und g'höra, dass's eim gwüss vergengi, das drittmol au noch z'schlaga: so het's ma ieda der Muot gno, und ieda het liaber syn Gulda ruehig im Sack gha, as villicht sy Läba gwoget an a Kista voll - i weiss nid was.

Jetz amol g`hört denn a jungs Pürschtli, aber an woghalsiga Kärli, au vo der Kista-n-und Krott im Wald und seit: «Bygott! i hola der Schatz, i fürchte mi nit vor Blendwerk!» Richtig nümt er d's Herz i beid Hend und got mitama Stecka dem Wald zua, und wia-er zwüschet de Tanna furtchlenderet, g'hört er ufeimol an wunderliapliha Gsang us der Höhi; er seit aber zua-nam selber: «I lose nit, bis i der Schatz han», und lauft wyter und findet noh-ama Wyli d'Schatzkista-n-und a fürchtigi Krott uf am Teckel. Er bsinnt si nid lang, tuet weidli a Streich und schlagt das grusig Tier aba vom Lid. Derwyle-n-aber singt's noh liebliher a's früeher in der Höhi, und d'Krott hoppet wider uffi uf d'Kista. Doch my Pürschtli nit ful und schlagt zum zweita-mol, und d'Krott hoppet noch amol uffi. Uf das nümt aber der Gsang Wysa-n-a, dass's dem Pürschtli tüf in syni jung Seel yne gryft, und er's unmögli meh verheba ka und halt über si luaget. Do g'sieht er grad über sym Kopf a schös Maitli im a schneewyssa Röckli ufama Nebeli sitza und a Mühlistei am-a Grashalm heba. Stuhableich vor Schrecka tuckt er si weidli und lauft, was er laufa mag, durdä Wald ussi. Hett er us G'wunderfitz nit in d'Höhi gluaget und muotig noch amol gschlaga, so wär er wol steirych worda.

Aus: C. Englert-Faye: Schweizer Märchen, Sagen und Fenggengeschichten, Basel 1984

H. R. Niederhäuser (Hrsg.)

Eingelesen von der Mutabor Märchenstiftung auf www.maerchenstiftung.ch