Es ist amol a seeleguata Ma gsi, der's nia über d's Herz het bringa könna, ama Tierli eppas z'tua ohni Ursach. Bsunders gära het er aber d' Gägaxli gha, und as het am ordeli weh tue ywendig, wem-m so-n-as uschuldigs Gschöpfli wo aso keim Mensch nüt z'Leid tuat, fürsetzli gmarteret het. Jetz amol schloft derselb Ma ufam Feld under-ama ticka Bomm y. Do kunt a Schlanga härakrocha über de Weg, g'sieht-na schlofa und will-na umbringa. Sie rupft mit-am Mul a füfplettrigs Kleeplatt us-am Gras, leit em's döt ana, wo sys Zeiha d's Herz lyt, krücht uf a Bomm und will döt aba schüssa ufd's Kleeblatt und dä guat Ma töda. Jetz düslet a Gägäxli weidli us am Busch füra, nümt's Kleeplatt, leit's danebed uf a Stei und springt widerum furt, so guat, a's es ka. D'Schlanga kunt derwyl ufa Bomm, kehrt si um und suecht uf am Ma das grüa Plettli, merkt aber kei Zeiheli, dass's Kleeplatt ufam Stei und nid uf am Ma lyt, schüsst mit aller Gwalt druf aba und verschmetteret-si grusam der Kopf.

Aus: C. Englert-Faye: Schweizer Märchen, Sagen und Fenggengeschichten, Basel 1984

H. R. Niederhäuser (Hrsg.)

Eingelesen von der Mutabor Märchenstiftung auf www.maerchenstiftung.ch