Vor Johr und Tag ist uf ara-n-Alp a Senneri gsi, und so oft sie am Obed ga melka ganga-n-ist, het sie d'Stalltür hindera zuegschlaga und vom schlechtesta Küehli de grösst Eimer voll Milch gmolka, dass all Alplüt nüt anders gmeint hend, a's sie könn hexa. Jetz amol goht der Alpmeister und seit: «Ei, Senneri, säg mer, wia milkst du dyni Küeh?» Aber d'Senneri will zerst nit ussa mit der Sproch, und nu, wyl er gär nit nohgit z'tribiliera, so seit sie: «Wenn d' die schönst Kuah dra woga witt, so will der zeiga, wia-n-i myni Küeh milk.»

«Es sei a Wort», git ara der Alpmeister zer Antwort, «luag dia sell schö bru Kuah dört uf am Rain doba, sie het a prächtigi Schella-n-a und schrytet den andera vorus - dia wogi dra.» Über das seit d'Senneri: «So will j sie melka!» Der Alpmeister will z'weg und will d'Kuah zum Melka vom Ram abahola, aber d'Senneri seit: «Das brucht si alls nit, loss dy Kuah doba», und schloht vier Zäpfa-n-i d'Stallwand und foht a melka a dena Zäpfa, und-äh gelt! es kunt us' em Holz Milch grunna i vier fingerdicka Brünneli, dass me nit gnuag Schiff und Gschirr i der Hütta het ufbrocht. Noch und noch seit aber d'Melkeri: «Jetz sött ma höra melka, es könnt sus Bluat ko.» - «Macht nüt», seit der Alpmeister, «milk du zua», und d'Senneri milkt und milkt, und richtig rinnt noch und noch Bluat für Milch us da Zäpfa, und über na's Wyli trolet die schö bru Kuah mustod aba vom Ram.

Aus: C. Englert- Faye, Alpensagen und Sennengeschichten aus der Schweiz, Zürich 1941. Eingelesen von der Mutabor Märchenstiftung auf www.maerchenstiftung.ch