En Bur het drei Töchtere gha, die si eppis yfältig, ugschicht gsi u mit dem Sack gschlage. Dem Bur wär es schier en Ehr gsi, wenn syner Töchtere alli hätte chönne hürate. Är het ne darvoa gsyt; da ist ne grüseli angst woarde un sie hei du welle hürate; er seit ne aber darby, är well ne e Dorfet areise un de well är ne's de abringe u für sie rede, Numine sölle sie de d's Mul halte. Un du gly druf het är ne es Paar Buebe zummene Mähli yglade, d's Flysch het me übertoa un d's Mähli akommediert u gsotte. Darmit het är ne welle zeige, dass är e ryche Bur sygi. Die Töchtere het's afange blanget und si usi ga achte, ob's nit gly rücki; es het si darby aber Wunder gnoa, wie de das Züg ablaufi; und eini chunnt du zur Tür ynhi z'springe u syt: «Au du, d's Flysch ist schottets.» Die Zweiti louft ere nah und syt: «Wasst du nüt, dass me nüt zäge scholl?» Die Dritti het du Fröud gha und seit du noa: «Guot, ih nüt zyt ha, ih de Ma chumme!» Es het du aber Kene glustet, wo sie ghört hei, wie sie rede, und us der Hürat het's du nüt gä.

Aus: C. Englert- Faye, Alpensagen und Sennengeschichten aus der Schweiz, Zürich 1941. Eingelesen von der Mutabor Märchenstiftung auf www.maerchenstiftung.ch