As ischt amol an arms Mandli gsi, as het guet könna mura und zimmera und wär au gära-n-a ryha Ma worda; aber es het füf Kinder gha, und do isch’s umögli gsi, e ryha Ma z’werda. Dua amol het in syner Pfarrei ds Wasser a Brugg am Kilchweg furtgfüert, und dia hett sölla schnell wider gmacht sy. Ma kunnt zum Mandli und frogt, ob’s um hundert Taler i der und der Zyt d’Brugg maha könni. D’s Mandli g’sieht wol y, as wär a schöna Loh, und bittet um a Tag Bedenkzyt. Ma git am si, und as bsinnt si der ganz Tag, bis am zwölfi z’Nacht und g’sieht am End, dass as im in där Zyt nit mögli ischt. Scho will’s trurig in ds Bett, aber uf eimol klopfet’s ganz lysli a Tür, und a klyns Mandli kunnt yna. As wünscht a guati Zyt und frogt der Murer, worum er so trurig sei. Der Murer verzellt-am alls, wia’s ischt. Ds kly Mandli lacht und seit: «Do isch bald gholfa: i stell der d’Brugg här in der bstimmta Zyt, aber die erscht Seel, wo vo dym Hus über d` Brugg goht, ischt my.» Dem Murer tschuderet’s efoha, wo-n-er merkt, wer selb kly Mandli sei, doch kunt-am gly eppes z’Sinn und är schlagt i der Vertrag y.

In der Zyt wia ds klyne Mandli gseit het, stoht d’Brugg fertig do, und der Tüfel wartet scho mitta druf uf die erscht Seel vo ds Murers Hus. Der Murer aber holt schnell der Geissbock us am Stall und jagt-na über d’Brugg. Wia dua der Tüfel der Geissbock häraträppla g’sieht, so rysst er am vor Zore der Schwanz us, und syt derselba Zyt händ d’Geissa kurzi Schwenz. Der Murer aber het die hundert Taler überko und isch boda-n-a ryha Ma gsi.

Aus: C. Englert-Faye. Us der Gschichtetrucke. Ein Schweizer Volksbuch für Jung und Alt, Bern 1963. 

Eingelesen von der Mutabor Märchenstiftung auf www.maerchenstiftung.ch