As Abedsch ischt as Wib van dr Brüggn dür ds Doggiloch iin in d Äuwja. Uf dr Bärgsitn lings ischt dr Gappwald. Wia sch a Stuck dinna gsin ischt, ghörtsch im Waldji aso as karjoos Gäbrüll wia var'ma Stiar. Aber schi het witer müassn, und wenn's Chrottä ghaggled hätti. Uf eimmal ischt denn au würkli an grosse, schwarza Stiar us am Wald här choon. Schi ischt an as Laufn, as ob sch dn Schwarzn uf em Rügg hätti. Dr Stiar ischt nun bis zurma Bächji choon, und dert hed'r ärchehrd und ischt dua widrm zrugg in dn Wald.

Wia sch dua in d Auwja choon ischt, hedsch das Ärläbnis an ara altn Äuwjari ärzellt. Und wia sch da gäredt heind, ischt noch an jungi Töchter au van dr Brüggn inner choon. Dia heintsch dua gfreeged, ob sch au aswas gsehn hei. Aber schi hed gseid, schi hei nüüd aswas Urächtsch gsehn. Dua het di Aalta aso gäblinzget und gseid: «Ja, söttnän geit ds Unghüür nid na.» «Bi diar aber muass nid grad alls in dr Ornig sin», seidsch zun däm Wib, wa dn Stiar gsehn khan hed. Dia hed äso dn Grind undergschlagn und gäbrummled: «I deichen schon!» und ischt gangen.

J. Vetsch. Ds Goldbrünneli. Eine Sagensammlung aus Klosters und Umgebung. Klosters 1982, © J. Vetsch

Eingelesen von der Mutabor Märchenstiftung auf www.maerchenstiftung.ch