As Purämännli hed as Abedsch bi schiiner Fäärlisuu gwachet, will sch Juged erwartet hed. Ds Tiar ischt rüabigs gsin, und di Chleinen sind äbn choon. Alls isch in dr Ornig gangen.

Dua springt uf eimmal a schwarzi Chatza under ds offen Gadnpfänschterli. In däm Augenblick steid dia Fäärlisuu uuf und hed angfangen wüatn. Schi hätti d Fäärli gfrässn, Stuck um Stuck, wenn schi dr Pur nid gflöökt hätti. D Chatza ischt fort gsin. Aber dr Pur hed gädeicht, schi chommi denn schon noch ammal und hed än Bäsmen us Fuulberiruatn gärüscht.

Und richtig isch d Chatza noch ammal under ds Palggji (Fensterladen) choon. Dua fahrt ara dr Pur mit däm gstareten Bäsmen rees in ds Gsicht, dass sch an überluuta Schrei abgglan hed und ussne abkiit ischt. Dr Pur hed aso gügglet und hed noch gsehn, wia die Chatza awägg gäzwäärled (getorkelt) ischt. Uf am Antritt ischt ara dua noch eini entgäget choon und hed scha gfreeged: «Hescht ätta eis mid arem Fuulberibäsmen überchoon?»

Am neechschtn Tag isch dua d Nachbüri Greta mid arama verbundnen Chopf und fürrotn Augen ummer gloffn. Schi het ds Gsicht volla Stüpf khan und niamen wella sägn, was ara fehli. Dr Pur, wa dr Fäärlisuu gwachet hed, hets gwisst und au dm eintn und andern ärzellt.

J. Vetsch. Ds Goldbrünneli. Eine Sagensammlung aus Klosters und Umgebung. Klosters 1982, © J. Vetsch

Eingelesen von der Mutabor Märchenstiftung auf www.maerchenstiftung.ch