I Schwendi, a Stond hender Apazell, ischt amol a Schloss ond im Schloss an Edilma gsi. Der ischt denn allpot für sinn Thurn ahi gsessa. An Bueb ischt do viil fürbi gganga i d'Berg gi Schotta hola. Der Bueb hed siba Gschwüschterni kah, ond isch gad a Bröckli witt vom Schloss dehaama gsi; im Rachchatobil haasst's. Der Vatter hed dört gmala n` ond bbacha.

Jetz ischt amol der Bueb am Schloss fürbi gganga, ond der Edilma hed a n'agredt, was der Vatter ond d'Muetter thüeid. Der Bueb hed em zer Antwort gge: „Der Vatter bacht ehggesses Brod, (eher gegessenes) ond die Muetter macht bös of bös. (Flicken auf Flicken) Der Edilma hed o wöla wissa, was d'Red in si hei, ond do ischt er inna worda, dass der Aalt das Mehl, wo-ner verbacha, nöd zzallt hei, ond die Aalt Bletz i-na verschrenzts Bickli Hääss büezi. (in ein zerrrissenes Stück Kleidung nähe) Wie do der Edilma gfroogtt hed, us wessa Grond si das thüeid, hed der Bueb gseid: "Eba daromm, dass d'üs aalls Gelt nehscht." Der Edilma hed em do tträut, er wöll d'Hönd a-na raaza.

Der Bueb gohd hee, ond verzellt do aalls mittenand. No sin Vatter gid em a Rööthli a, er söll gad a n' andersch Mohl Taase  (Butten, die wie Tragkörbe auf dem Rücken getragen werden) onderschüberschi träga, ond a Katz dri tho.

Der Bueb macht's asa, ond gohd do ena Weg 'm Schloss zue. Der Edilma stellt a wider z' Red: "No, du Witznasa, sela (wohlan nun)kaatsch mer säga wedersch, hand d' Ageschta (Elstern) meh wiiss oder schwarz Federa? Der Bueb seid: "Meh schwarz." — "Worumm?" — "Wil halt d'Tüfil mit de Zwingherra meh z'schaffid hand, as d'Engil."

Do lohd der Edilma d' Hönd aab; der Bueb lohd d' Katz usa. D' Hönd springid der Katz noh, ond der Bueb hed amig no möga lacha; aber er hed si da gnotha (genötigten)Weg 's Tobil abi gmacht. Der Edilma, nöd fuul, ischt em mittem Spiiess noi, hed a donna überko ond do z' Tod gstocha.

Ma ka si's tehnka, der Vatter vom Bueba hed do vor Rooch  völlig ggiret, (vor Rache geknirscht) ond die ganz Puursame zämmetho. Es sönd dem Edilma do Füess gmacht worda, ond er hed nöd möge uf de Fehneraspitz ui" ko, so hed er scho gseha 's Füür zuem Schloss uusflacka.

(Mundart der Almensperger auf Walzenhansen)

Quelle: H. Herzog. Schweizer Sagen für Jung und Alt dargestellt, erster Band, Aarau 1871 

Eingelesen von der Mutabor Märchenstiftung auf www.maerchenstiftung.ch