Jä, vonn-ärä Chatz chennt ich scho äu ä Gschicht verzellä. Das isch i Linthel änä'passiärt im Kanton Glaris. Da sind einisch amm-änä-n-Abed ä Tschuppel Meitli und Büebä midänand i d'Mäijänandacht ggangä. Und darnah gsehnt-si uf-ärä Mürä-n-obä-n-ä Chatz grüppä, und einä vo denä Büebä het-si wellä-n-appäjagä. »Ä pa!« hennd diä andärä gseit, »lach dü diä Chatz dobä!« Wo-ssi vo Chilä chu sind, isch diä Chatz immer nu am glychä Postä gsy und am andärä-n-Abed äu wieder. Und darnah het doch afigs einä-n-ä Stei gnu und hed-ä dem Tiär da agriährt und hed-em grad ä Taapä 'troffä. Am andärä Tag het düe äs Meitli i der Fabrik gfählt, und wo's speeter wider i d'Fabrik chu isch, hets zwee Finger abgha. Düe hennt-s' de gwißt; was das fir-ni Chatz gsy isch!

Frau Wipfli-Herger, 78 J. alt, Schattdorf

Quelle: Müller, Josef: Sagen aus Uri 1-3. Bd. 1-2 ed. Hanns Bächtold-Stäubli; Bd. 3 ed. Robert Wildhaber. Basel: G. Krebs, 1926, 1929, 1945

Eingelesen von der Mutabor Märchenstiftung auf www.maerchenstiftung.ch.