«Heit er der Holzhauer au wieder gkört in der Lauch? Jetz wei mer aber mache, dass mer’s noh yne bringe, es chunnt wieder öppis,» het amme der Birchschaggob zue mer gseit, und er het gwöhnlig rächt gha. Wenn me der Holzhauer gkört, so git’s sicher ander Wätter. Aber arig isch’s, dass me-n-ihn am Sunntig z’nacht gkört; me seit, er syg zu syne Läbzyte gwöhnlig amene Sunntig go holze und mües jetz zur Strof au no im Tod wieder cho. ’S Zimmers Marti het gseit, er heig ihn in de-n-achzger Johre-n-einisch gseh, am Tag bim Holze, es syg es ganz rots, gschwinds Mannli gsi. Jetz gseh ha-n-ich ihn noh nie, aber gkört scho mängisch, früecher no mehr als jetz.

Quelle: G. Müller/P. Suter, Sagen aus Baselland, Liestal 1939.

Eingelesen von der Mutabor Märchenstiftung, www.maerchenstiftung.ch