Äis wän es Mäitli und em Bööb gsiin; si sii zsäme ggangen und Häm enandre z'hiirate versprochen. Dr Bööb ischd o hin uw wider z'Dorf chun; aber ds Mäitli hed im itinged, all Aben brüüch er nid z'chun und äimmel afen an däm und däm Aben nid. Dr Bööb hed an däm Bschäid gchuwwen. Am End faad er an argwoonen, da chennti en andra im Spil siin und är im Gaaren. Allem z'Trutz ischd er an enem verbotnen Abe ggangen. Ar hed ds Pfäischter acharrs funden. In dr Chamer isch'sch stills gsiin wee in arra Chilchen. Im Bett ischd ds Mäitli glägen; äs hed nid en Atezug taan, nid es Gliidelli gwäigged und ischd chaalts gsiin wee nen Zischzapfen. Ar hed gmäind, äs siigi gstorbes. Döö chunnd vum Pfäischterli naha en Ummel z'surren; är hed si dem Mäitli uf ds offem Müül gsetzd und ischd inhigschnaagged. Jetz hed ds Mäitli d'Oigen üüftaan, hed si afa-w-wäiggen und mid dem Bööb afa beichten, wee wen niid vergange-w-wän.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.