Das wä täich eppa vor vile Jaare gsiin. Da wä s' a-w-Wende gsiin mid dr War, und döö häi s' e Stimm gheerd, si sellen abfaaren u-f-fleen. Si häin aber niid drum taan und häi gsäid, ja epp' äis, ja, epp' äis de-w-wol. Döö hed dee gliich Stimm zem andrem Mal gwarned. Jetz siigi niid ggrächets, häi s' zem Firwort ghäben, ma chenni doch nid faaren. Und zem drittem Mal hed dee gliich Stimm gwarned: „Abfaaren u-f-fleen!" Ja, moren, häi s' gsäid, da siige s' ggräched.

Moren isch z'spät gsiin. Am gliiche Tag hed's es Wätter ggän. Derallshar hed's dem Bach üüsagreerrd. Goleti ung Goleti Stäina hed er derharbbrachd. D'Hitti hed er furtgschwäichd. Liit u-w-War hed er undergmachd.

Aina wän häi gsiin. Där häigi no chenne sägen, wee dee Stimm z'driijem Malen gwarned häigi.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.