Josellis Chaschper ischd e tolla, rotbräächa Burscht gsiin; dr ganz Tag hed er gsungen old ghoired und den nid eppä wee nen Ummel in enem Bräntli! Das ischd vun äim uf en andra Tag anders worden, wan er us dr Chamer furt i ds Loibelli ischd ge schlafen; ds Doggelli hed nen afa plagen. Wen er im erschte Schlaf ischd gsiin, isch'sch chun. Vor em Hüüs isch'sch über d' Stäina däässelled; den isch'sch im Gengli gsiin; d'Hüüstiren ischd üüf; d'Loibestägen hed gchrächled; uf em Loibengang si Tritta chun, und den isch'sch zer Loibetiren inha. Vor em Bett hed's es Raschtli gwarted; e Gump und äs sitzd im uf dr Bruscht! Wee nen Heww- chlupfel isch'sch im uf dr Bruscht glägen; nid es Wort mee hed er virhäbbrachd, hed nid chenne flööchen und nid e-w-Woich töön! I Churzem si Chaschpren dee rote-w-Wange vergangen, und är hed virhä gseen, as wen er undrem Bode virhächäämmi !Jetz hed im äina graaten, är selli e Staachel i Strewwisack töön. Das hed er gmachd, und virohin ischd ds Doggelli niimmä chun.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.