Ds Groosi häd iis o vum Gäismäitli bbrichted. Äs wän no es chliis Mäitellti gsiin; döö wä d'Möötter mid im i d'Grini. D' Möötter hed afan Härpfel wäglen und si hed ghüüselled. Uf ds Mal säid ds Mäitli: „Gugg, Möötter, uf em Legsparrli!"

„Was uf em Legsparrli?" D'Möötter hed niid und nemmre gseen und wägled wiiters. „Uf em Legsparrli sitzd es Mäitli und sträälld ds Haar. Gugg, äs hed ja es wiisses Schurzli an."

Jetz erwached d'Möötter; si wäis, was das fir nes Mäitli ischd. Si springd zem Chind, nimmd's an en Arvel und fleed.

Ma hed däm Mäitli o Grinimäitli gsäid; ma hed's drum geng in dr Grini gseen. Mengsmal siigi's uber d'Schränndli und uber em Bärg embrin bis abhi uf en Alpbach, aber wiiter nid.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.