Äs hed e Ziid ggän, ma gseed's no hiitigs Tags, da ischd dr Lowwibach dir em Bärengraben und gäg em Twing abhachun. Aber döö hed äis äina, Dratt sälig hed gsäid wär, dem Wasser de-w-Wäg verläid, und döö, was gäid? Äs hed dem Bach uf dr Hoflöösiiten üüsigreerrd, das er uberfeerd und ubersaared und z' Hoflöö d'Hiiser ibsetzd hed.

Siithar chunnd dr Bach heenahet Hoflöö inha, um bim Bärengraben und Twing chunnd egghäim Bach mee.

Där, wa dem Bach de-r-rächte-w-Wäg verläid hed, ischd nid a d'Rööww chun. Am Stolle gheerd ma hoiren, bsunders we's läids Wätter wolld gän, und ma hed vum Stollenhoiri old vum Stollenhoirer afa brichten.

Äis ischd Dratt vum Baalisalp häin. Im Waald hed geng äina ghoired, bald da, bald dert, undermalen rächter Hand und den umhi lingger. Und eso isch'sch ggangen, bis er i d'Geeter und uf Ägetum ischd chun.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.