Vor vill, vill Jore hät’s z’Alterf en habgirrige, gitige Bur gha. Sin Git ischt so groß gsi, da-n-er mitte i dr Nacht uffgstande ischt und Marktstö versetzt hätt. So sind alli sini Äcker, Wise und Räbberg größer, die vo sine Nochbere hergege chliner worde.

Wo dä Gitchrage gstorbe gsi ischt, hätt er i dr Ebigkeit ko Rue gfunde. Zurr Strof hätt dä Grundschelm all Nacht möse i de Wise und Felder umelaufe, wo-n-er Markte versetzt hätt. Wärr z’Nacht spot a-ne-me Grundstuck dure got, wo-ne-moll im Marktversetzer ghört hätt, siet en Ma i einem (jenem) Acker inne sto, wo grabt und schuflet we lätz. Allpott got-er fürsi bis zur nöchste Markt. Dro tuet-er grochse und tröisse we ne Roß, wo Kolik hätt, lot d’Aerm lampe, würft si dro i dr Täubi wüetig i d’Luft, gheit uff de Bode härre und trohlet druff ume.

E andermoll siet me konn Ma, aber e chli, urue[h]ig Liechtli, wo stundelang dr richtige Grenze nofahrt. Da Liechtli ischt nemer anders als dr Marktversetzer. Er hätt etz aber allwäg si Strof abbüeßt, wenigstens hätt-men in letschte Joore numme gsäh.

(Altdorf)

Aus: R. Frauenfelder, Sagen und Legenden aus dem Kanton Schaffhausen, Schaffhausen 1933.
Eingelesen von der Mutabor Märchenstiftung auf www.maerchenstiftung.ch