An Oberblegi isch e See. Wo ds Wasser ine chunnt, gsiht mä, aber wo’s uselauft, het män erscht gmerggt, wo dr Leuggelbacher Geisser gmeint het, er mües chrüüzwiis drüberübere schwimme. Dr Puur i der Hütte het em’s gwehrt und gseit: «Bis nüd e Naar, mä mues Gott nüd versueche, staht i der Gschrift.» Aber dr Geisser git umme: «Sig’s jez em Hergott lieb oder leid, so will i übere!»

Dr Puur tänggt: Nu sine? und lueget em zue, wener schwimmt. Schier wär er dänne gsi, da ninnt’s ene uf eimal abe. Um deselb Stund holt si Mueter im Leuggelbach Wasser. Was meined er, as ere i d Gelte gumpet sig? Dr Chopf vu irem Bueb, wo dobe übere See hät welle schwimme.

Quelle: K. Freuler, H. Thürer, Glarner Sagen, Glarus 1953
Eingelesen von der Mutabor Märchenstiftung, www.maerchenstiftung.ch