Amal sy an guote, brave Bur g'sy, wa niemal über d's Wetter g'fuchtot hät, es hey mögu sy, wettigs es wellu hei. We's oich noch so ulustig's und leid's Wetter g'macht hät, so hei er allzit g'seit: «D's Wetter ist guot, d's Wetter ist guot!» — Zuo der Zit wa der Glicho g'storbun ist und Lich ufg'lägu hät, hei es erschrecklich's wüest's Wetter g'macht. Ja am Tag, wa mu-nu hät sellu vergrabu, sy schi's Grab halbvolls Reguwasser g'sy. Da heige die Totuwächter z'sämu g'seit: «Was würdi der Verstorbino, wenn er noch redu chönti, z'dischum abschüchlichu Wetter sägu? Würdi er hit oich noch sägu: D's Wetter ist guot.» Da heige schich der Toto, wa ner Lich ufg'lägu hät, ufg'häbet, und mit luter Stimm g'seit: «Ja, d's Wetter ist guot!» Und d'ruf schich wieder niederg'leit und wider an toti Lich g'sy, wie derfir.

Quelle: M. Tscheinen, P. J. Ruppen, Walliser Sagen, gesammelt und herausgegeben von Sagenfreunden, Sitten 1872.
Eingelesen von der Mutabor Märchenstiftung auf www.maerchenstiftung.ch