Am Riederberg, Gibiet va Sant-Niklas, sy einest a Ma g'si, der hei hundert Jahr lang, und zwar im nämlichu Hus, g'lebt. Nach schim Tod sy a-mal di Totu-Prozessio bi dischum Hus verbi gizogu. As grössers Chind hei ebu ze Pfeistru usg'seh, wa die Totu verbicho sy. Uf eimal hei das lut ufg'hoirot: «Ja währli, währli, da chunt bi miner Trüw üsche Grossvater.» Ouch d'andru Huslüt sy an s Pfeister g'liffu und hei doch ditlich du Grossvater b'chennt, der hundertjährige cho ist. Wie er nu grad unter de Pfeistru varbipassiert ist, hei er du Chopf uf eimal ufg'hebet und umbruf gegu'n d's Hus gizeicht und mit luter Stimm g'seit: «Da bin i ou a-mal über Nacht g'sy!» —- Er hät darmit ohni Zwifol wellu z'verstah gäh: Hundert Jahr, oder a-n Nacht sy glich viel gegun d'Ewigkeit.

Quelle: M. Tscheinen, P. J. Ruppen, Walliser Sagen, gesammelt und herausgegeben von Sagenfreunden, Sitten 1872.
Eingelesen von der Mutabor Märchenstiftung auf www.maerchenstiftung.ch