Antusuhans selig (der Hans des Anton Anthanmatten) ischt en tolle brave Ma g'si; het frili nit g'rad d's Pulver erfunnu, aber do de Litu in's G'sicht g'seit, was er gedeicht het. Wa der Bischof Blatter selig i Saas uf d' Visitaz cho ischt, ischt Antusuhans Chilchuvogt g'si und het darum miessu schaffu und ufwarte. Da isch's kapitiert, dass der Bischof am Mittagessu g'seit het, in de Täleru und uf de Bärgu gäbe es guots Roggubrod; er wellti geru danafa choru. Duo hensch dum Chilchuvogt g'rieft, er selle abu um guots Roggubrod lotze, der Bischof welle schi. Duo ischt unse Hans glich mitener wissu Zwelu inner Hand in d' Stube cho und het dum Bischof g'seit: «A ba! Narrheite! Bischof! Sid nit Eifältige! Esset ier hie Wisbrod — Roggubrod chenter de de heimu essu.»

(Saaser Mundart)

Quelle: M. Tscheinen, P. J. Ruppen, Walliser Sagen, gesammelt und herausgegeben von Sagenfreunden, Sitten 1872.
Eingelesen von der Mutabor Märchenstiftung auf www.maerchenstiftung.ch