Dia wilda Mannli sind in viela Stugga viel gschyder gsi as ander Lüt, und d Vättnerberger hind viel vuna glehrt, under anderm au das, wia ma ds Holz fellt.

Früehjer het ma ds Holz albig nu mit der Äx gfellt. Doa sind dinn dia wilda Mannli, wyls au gär gwündrig gsi sind, chu ga zualuaga und hind indli, wos a paar dumma Kärli zuagluagat gha hind, dChöpf erschüttet und hind gseit: «Miar wind ni zeiga, wia ma Holz feilt.»

Am andara Tag, wias gwyset het, sa sind die wilda Mannli schu mit ara frisch gfylata Schrötersaga uf Ort und Stell gsi und hind da Berger grüaft. Nohär hind die zwei Mannli mitanand agfocht saga, und die andara hind zuagluagat. Wias as sie halba ygsagat gha hind, het müasa a Berger mit dm eina Mannli ferig saga. Wyl doa d Danna gfalla ist, het dr Berger da Finggastrich gnu und ist gsprunga, sa ross as ar müga het.

Das wild Mannli het aber nu zwei Schritt gmacht und ist stillgstan-da. Ihm hets nüt doa; aber da andara hets um ei Hoor erschlaga. Wia das dBerger gsieh hind, hinds gfroget: «Worum bist du nit wyter gfloha?» Ds Mannli het gseit: «Hinders nit gsieh? I ha dur Danna uffi gluagat, uf welhi Syta as si falli, und doa bin i nu uf die ander gstanda. So hets mer nüt doa."

Vu jetz aweg hind dBerger gwüsst, wie ma  Hozlz fellt, und das au ander Lüta erzellt. Also ist d dSach in dWelt ussi chu.  Si hind dua bem Heiguh aber zuananand gseit: «Ma cha mingmohl no vu Chlyna etschwas lehra."

Aus: C. Englert Faye, Von kleinen Leuten. 102 Zwergensagen, Feen und Fänggengeschichten aus der Schweiz, Bern 1937.

Eingelesen von der Mutabor Märchenstiftung auf www.maerchenstiftung.ch