Der Peter Geel vu Vild ist emoul spout in der Nacht vu Mels gägem Städtli dure chu überts Fäld. Bem Chrüz chunt e Fuchs zuehe und het ganz zahm tue. Der Peter, nit ful und nünnt de Fuchs ine leire Sagg, wo-n-er bei-n-em gha hät, und mit uffe Rugge. Wie-n-er zum steinerne Stäg chunt, ghöürt er e Wyberstimm vu der Wand ahe gelle: «Gragörli, chum jez!» Duä antwortet's: «J cha nit, i bi ins Peter Geele Sagg in!» Der Peter würft der Sagg erschrogge vum Buggel und lout der Fuchs laufe. Där hät der Schwanz zwüsched d'Bein gnu und ist we bsässe der Wand zue.

Aus: C. Englert- Faye, Alpensagen und Sennengeschichten aus der Schweiz, Zürich 1941. Eingelesen von der Mutabor Märchenstiftung auf www.maerchenstiftung.ch