Im Staufebach

Es isch im Winter gsi. Ig u dr Hälibänz si zsäme go Bäseris haue. Im Staufebach bin i in es Birchli uehegchläderet u ha abegmacht.

Eismols macht dr Hälibänz: „E, dr Tüner! Chum abe! Gschwing, gschwing. Äs chunnt eine.“ Im Schwick bin i deniede gsi. Du chunnt e Ma derhär, d’Häng uf em Rügge, i halblinige Hose un Überstrümpfe, ire Füdlechlopferchutte u mit ere Büssichappen uf em Chopf. Är luegt uehen i ‘s Birchli; ig au, wott ne-n aluege u gseh kes Bei meh.

Dr Hälibänz isch hinger em Haslehag versteckt gsi; ihm isch es glich gange.

Drufabe si mer zsäme gäg Ochleberg zue. Ungerwägs het’s afo abehaue; mir hei ke trochene Fade meh an is gha. Nass wie d’Müs si mer gäge d’Pinte u hei es Zweuerli gha.

Mi Muetter, wo wit umenangere isch cho, het gseit: „Jo, das isch dä u dä. Dä het me scho meh gseh.“

M. Sooder, Sagen aus Rohrbach, Huttwil 1929

Eingelesen von der Mutabor Märchenstiftung auf www.maerchenstiftung.ch.