Es chlis schwarzes Fraueli

E Bur het es Heimet gchauft gha. Uf dr Weid isch en alte Nussbaum gstange, wo sicher scho mängs Johr nüt meh treit het. Du het er dä alt Chrüppel umgmacht, heigno u verholzet.

Derno isch’sch gfählt gsi. Ei Chueh no dr angere het's gno un isch druffgange. U dr Bur het es chlis schwarzes Fraueli gseh, wie‘s are Chueh uf ‘s Chrüz schlot. Drufabe isch die Chueh umgheit u z’Bode u tot gsi. Mi het das Fraueli wellen itue; aber das het gseit: „Worum heit dr mi nid im Nussbaum lo si? Jetz bin i do u ha 's Rächt, do z’bliebe.“

Drufabe het dr Bur e schwarze Geissbock i Stall to. Jetz isch das Fraueli hinger dä har, bsungerbar i dr heilige Zit, u de het dr Geissbock brüelet, dass es nid isch zum Zuelose gsi. Ändtligen isch es eim glunge, das Fraueli z'foh; aber äs heig ‘s Rächt im Hus z’si. het es bhertet u du het er’sch imene Beijichorb unger d’Husfirscht to.

M. Sooder, Sagen aus Rohrbach, Huttwil 1929

Eingelesen von der Mutabor Märchenstiftung auf www.maerchenstiftung.ch.