Wärber bim Tanz

Z’Gumiswil isch Tanz gsi. Gli isch es handtli gange; äs si au Wärber im Wirtshus gsi.

Ungereinisch het’s gheisse, wär jetz tanzi, sig Regrut.
Ungsinnet chunnt dr Bärghans ihe, e junge Bursch u doch e Ma wie nen Eich. Är het nüt vo der Sach gwüsst u het au tanzet. Du het es gheisse: „Jetz bisch agworbe!“
„Was agworbe!“ het er druf gmacht, „Chuutzemischt, i weiss nüt dervo.“
„Dänk wohl“, het er umen ubercho, „du weisch wohl, wie mer gmacht hei.“

Im Hangumdrähihe isch e ganze Chuppelen um ihn ume gsi, u eine het ihm vo hinger ’s Handgäld i Sack gstosse. „Äs gilt nüt hingertsi drus“, het dä brüelet, „’s Handgäld treit er jo im Sack.“

Jetzt het dr Hans dr Handel begriffe; ä tuet e Griff uf ene Stuehl u dräiht es Bei ab. Du het er afo usteile. Zletscht isch er eleini gsi, u niemer het’s gwogt, ihm es Hörli z’chrümme.

M. Sooder, Sagen aus Rohrbach, Huttwil 1929

Eingelesen von der Mutabor Märchenstiftung auf www.maerchenstiftung.ch.