Anno Einedryssgi isch e-n-Abstimmig gsi, wär by der Stadt wöll blybe und wär’s mit de-n-Insurgänte heig. In eusem Hus z Ammel hei si alli Mannevölcher in der vordere Stube versammlet. E jede het eleigg müese ins Näbestübli goh und dort sy Stimmcharte in es wyssis oder in es schwarzis Chischtli gheie. Will`s der Gmeinrot aber wunder gnoh het, wie die Manne stimme, het me-n-am Tag vorhär scho in d’Chammertür es Loch bohret und d’Mueter het die ganzi Zyt müese ufeme Schemeli obe stoh i der Chuchi uss und zue däm Loch yne luege, wie die Manne stimme.

Quelle: G. Müller/P. Suter, Sagen aus Baselland, Liestal 1939.

Eingelesen von der Mutabor Märchenstiftung, www.maerchenstiftung.ch