E junga Burscht hed am Mägisalp galped; är hed es Mäitli in dr Falcherren im Gräis ghäben. Döö hed er äis zöö-n-im wellen; aber är hed's nid gööd troffen; äs ischd gletscherchalts im Bett glägen, ds Müül toor-uwwagewwiits offes.

In däm Oigemblick ischd e schwarzi Chatz zem Pfäischter inha- chun; si ischd uf ds Bett gsprungen und dem Mäitli zem Müül in und dir en Hals abgschliffen.

Dr Bööb hed gnöög gwissd; är ischd i d'Nacht üüsi und furt. Iwäreddäm ischd ds Mäitli under ds Pfäischter chun, hed afan üüsbrooten und taa-w-wee ne-w-Wigglen.

Är hed nid lang glosd und ischd derdirab und an andrem Bärg uberhi.

Bald hed's afan glitzmen und rimellen.                 

In dr Riiti ischd er zer Schweschter und hed ra gsäid, wee- n-er 's in dr Falcherre troffen häigi. Underwiilen hed's gschinen, glitzmed und dundred, äi Schiin und Chlapf am andren, um bbald hed's grägned, as we's us Mälchtren abhaleesti. D'Schweschter hed im aghäben, är selli inhichun um bbin däm Wätter nid z'Alp. „Und de ds Vee?" hed er gsäid, und dermid ischd er i ds Wätter üüsi.

Aber nee ischd er am Mägisalp chun; am Tag derna hed me ne tood im Vorsess funden.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.