Bim Wäschhüüstrog hed z’Mittinacht geng es Mäitli gwäschen. Vil häi’s gseen; aber neemen hed mid im derffen afa bbrichten.

Äis hed äina spät gägen häin a Sunnsiite-w-wellen. Das Mäitli ischd aber am Trog gsiin, hed nid es Wort gsäpd ung gwäschen. Är bliibd staan, nimmt ds Härz im beed Hend und fräägd: „Fir wä-w-wäschischd düü da äimmel o geng?“
„Fir sibenesibezg Seelen“, hed ds Mäitli gsäid und hed wiiter gwäschen.

Das Mäitli häigi, eso häi d’Liit gsäid, es Chliis um ds Läbe bbrachd, und sibenesibezg wä d’Zaal gsiin vun dänen, wa wän nahachun.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.