Dr Balzler z'Jsembolgen hed mee gseen wan ander Liit; är ischd drum es Frowwfaschteching gsiin.

Äis hed er gägem Balm wellen und ischd bald bir Aarbrigg gsiin. Vo-w-wiitem hed er e Froww mid zwelf Chinde gseen. Wan er zer Brigg ischd chun, hed er wäder vun dr Froww no vu Chinden egghäin gottsegerläi neena mee niid gseen. Aber äs hed nen doch Wunder gnun, wa si der jetz verschliffen häigen. Döö, gugg, under dr Brigg rochled e-l-Loosen, und um sa um zwiigglen und schnudren zwelf Fäärleni.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.