Am Mägisalp siin drii Älper äinig worden, si wellen am Samsdegznacht zum Mäitlene z'Dorf. Äs ischd im Vernachte gsiin, wa si us em Läger virha siin; si siin gägen niwwen Hag chun; gläitig sii s' uf Oberegg verbii und chemen gäge d'Eggleni.

Döö siin da vor ener Schiir drii Mäitleni gsiin; si siin uf dr Bsetzi gsässen. D'Älper sii zööhi; si häin mid dem Mäitlenen afan dorfen und zellen und siin äinig worden, zsämen i d'Dili z'gaan. D'Mäitleni sii vorüüs, d'Läitren embrüüf, dee drii hinnennahi. Jetz gseed äina, wee-n-es Mäitli en Gäisföös uf ene Säigel setzd, uw we-n-er der andre zwoo i d'Oigen nimmd, gwaared er Gäisfeess; Dotz uber Mäis springd er dervun und dee andren im naa.

Dee drii Mäitleni siin neemmen anders gsiin wa ds Engschtlemmäitli, ds Grinimäitli und d'Schwarzeflöömäitli.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.