Fangisalp ischd dr obrischt Staafel am Bättenalp. Vu Fangisalp faare d'Älper mid de Chüenen in Oberbärg z'Tagweid. Eis wän due ds Tagweidren an enem Älper gsiin, wa lieber dem Spil und dr Churzwiil naaggangen wän. Är hed d'Huetschaft dem Bueb ubergän und hed dr Sach nüüd mee naagfraagd.

Aber grad an däm Tag hed ds Wätter gcheerd. Von unnen ufa hed's afa booggen; im Bärgen hed's Fätze triben; brandschwarz isch ds Wätter chon.

Dr Bueb hed afa zsämetriiben; aber eis, zwei ischd es wieschts Hagelwätter da gsiin, und dr Bueb hed d'Chüe nümme möge bhan. Vom Schweiffisband sii s' dür d'Volla ab und d'Stila in dr Luft uber d'Oberbärgflue und uber d'Schöpf us, eini um die ander; allu hed's z'Hudle und z'Fätze grüerrd. Dr leschte Chue hed si dr Bueb a Stil gheichd, für se zruggzhan; aber si ischd o uber d'Flue us und hed nen nahigschrissen.

Dr Älper, wa dem Spil naa ischd ggangen, hed alls vernon; derna ischd er furt und nie mee umhi chon.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.