Hinderhi im Ürbech ischd en gööti, bravi Alp gsiin. En Älper hed mid enem Handchnab ds Vee bsorged, und d'Chee häi s im Tag driimal meessen mälchen. Das hed vil Arbäit ggän, und dr Älper hed ds Fleekichrüüd verfleekd. Drum häissd's Fleekichrüüd. Düü bchennschd es doch? Nid? Äs hed eso Stengel uw wem ma äina zerbrichd, chunnd es ganzes Glinntelli Milch üüsa z'rinnen. Äis häi d'Chee das Chrüüd chenne frässen; aber jetz nimmä; wa ds Chrüüd ischd verfleekts gsiin, ischd d'Milch giftegi worden.

Dr Älper ischd en Uflaat gsiin; es Mäitli wäm bee-n-im gsiin; däm hed er alls z'Leeb taan; aber wa d'Möötter ischd chun, hed er rra mid Cheedräck versiwweti Milch i ds Muttli taan. Dermid hed er si versindegeb.

D'Flöö und dr Gletscher sii virhaghiid und häin alls Läbends, Liit u-w-War, undergmachd. Um Bleemlisalp iischd no hiit undrem Iisch.

Aber dr Älper und sii Katriin siin nid a d'Rööww chun. Wär uber dee Stäigoleten gäid, wa d'Bleemlisalkp drunder ischd, gheerd den Älper chlagen:

»Mi Chöö brüün,

Min Hund Rüün

Um miin Höör Katriin

Meesseb immer und ewig

Uf Bleemlisalp siin.“

Aber d'Liit sägen, wem ma die brüün Chöö, wa undrem Gletscher ischd, chennti mälhen, geengi ds Iisch ab und d'Alp wän enumhi gööd.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.