E Pommatter hed mid fiif Rosse gsoimmed. I Laagle hed er Wii ghäben. Im Üüsiwäg ischd er zer Zube chun, wa dr Wäg eso schmala ischd, uf äir Sitte d'Flöö, uf dr andre d'Lamm. Im Wäg ischd es Zwäärgli gsiin, und d'Ross häin nid gäbig verbii wegen. Döö hed dr Säimmer d'Gäisle gnun und hed ani Sorg um Borg uf ds Zwäärgli afam brätschen und reerren und hed derzöö gflööhed u taan wee nes Ughiir. Ds Zwäärgli hed gmööled wee nes Hooren, und döö sii zringetum us en Nellen und Fleenen d'Zwäärgleni chu z'loiffen und häin das Zwäärgli üüfgläsen und tots häiträägen.

Dr Säimmer und d'Ross sii-w-wiiters, gägen dee üüsser Ürwäid und gägem Breens.

Im Zruggwäg hed dr Säimmer d'Ross zsämebbunde ghäben. Ds vordrischt Ros hed er gfeerd. Eso ischd er zer häälem Blatte chun. Döö verstirfled es Ros u chunnd in Uvortel; äs welbd üüfi, schriissd ds ander nahi, beedi zsäme ds dritt und eso äis naa em andren; ds lescht wolld dr Säimmer han, und das schriissd nen o üüsi, und d'Ross und dr Säimmer ghijen i d'Lamm und ertriicen im Wasser.

Äs wolld alls han, da siige d'Zwäärge derhinder gsiin.

Siithar gheerd ma z'gwisse Ziiten bir häälem Blatten es armeetigs Gschräi us dr Lamm üüsa.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.