Äim im Eggacher hed troimd, är selli an enem gwisse Tag gem Bäären und uf dee und dee Brigg. Är hed's eso gmachd. Döö ischd äina chun und hed dän im Eggacher da gsee stotzen und hed gwundred, was är da machi. Är hed im gsäid, im häigi troimd, är selli hiit da uf dee Brigg und jetze siig er da und siige se-w-warten, was selli gaan.

Döö hed dr ander e Tscholle glached ung gsäid: „Düü bischd e-l-Lappi. Meer hed o troimd, im Eggacher under dr Fiirblatte siigi es Chesselli volls Gäld. Aber i wäis nid, wa dr Eggacher ischd, und töön dessetwägen nid e Tritt u chrimmbben nid e Finger!" Dermid ischd er furt und hed dän im Eggacher la staan.

Aber där ischd häin und hed anggäänds d'Fiirblatten abglifted. Döö ischd es Chosechesselli volls Gäld virhachun. Jetz ischd er e- r-riicha Ma gsiin, oni das er all Rägetaga hed chennen erben, und ds erscht, wan er hed gchoifd, ischd em Minch gsiin.             

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.