a) In der Orismühli sy e Zytlang alli Morge bi de Ross d Mähnehoor züpflet gsi. Dass do öppis nit mit rächte Dinge zuegangen isch, het men an de Züpfli gmerkt; die sy allewyl vo usse ynezue züpflet gsi. Dorum het me ne Häxezüpfli gsait. Uf das abe isch den Orislüte agrote worde, si selle luege, ass si e schwarze Geissbock überchömme, wo keis wysses Höörli haig. Die Lüt hai also esone Bock in Stall yne to. Uf das hi hets besseret. S Züpfle het uufghört, aber der Geissbock isch alli Morge pflätschnass gsi und dur e Tag wie gschlagen ummegläge.

b) In der Orismühli isch einisch vo Zyt zu Zyt am Morge es Ross tot im Stall gläge. Do hai d Lüt in der Mühli e Kapizyner lo cho. Da het ene agrote, si sellen e schwarze Geissbock, wo keis wyssis Höörli haig, in Stall tue. Si hai so eine zueto, und vo dort a hets besseret. Mängsmol hai si aber gchört, wie eine drümol in der Nacht uf däm Geissbock im Stall umenand rytet. D Ross hai sider Ruji gha, derfür aber hets Gspängscht der Geissbock plogt.

Seltisberg

Quelle: P. Suter/E. Strübin, Baselbieter Sagen. Quellen und Forschungen zur Geschichte und Landeskunde des Kantons Basel, Band 14. Liestal 1976

Eingelesen von der Mutabor Märchenstiftung auf www.maerchenstiftung.ch.