Erzählt in Bündner Mundart und auf Romanisch von der Erzählerin Sandra Greta Blum. Zu hören im Freilichtmuseum Ballenberg in der Sennhütte von Val Müstair.

Las treis clavs dad aur
Treis paupers frars han bandunau lur marcau per ir viado el mund a fadigiar. Avon la porta sura han els priu cumiau. „Tgau ensemen!“
„Sin seveser!“
„Stei bein!“
 Il pli vegl ei vegnius ellas muntognas selvadias. Cheu steva ina biala diala en in casti da marmel sin in grep da granit. La buna diala ha priu il buob en survetsch.
Suenter in onn ha la diala detg: „Teidla, jeu vai dad ir naven per in temps. Tochen ch’jeu tuornel anavos, eis ti il survegilader da miu casti. Mira, jeu dundel a ti las treis clavs dad aur dallas treis combras.
La dretga e la seniastra astgas ti arver, mo la combra enamiez astgas mai mai arver.“
„Daco, tgei eis ei en leu?“
„L’entira bellezia dil mund.“

Il buob ha ditg patertgau suenter. Lu ha el aviert igl esch dretg. Mett’avon: La combra era plein talers dad aur. Allura ha el aviert igl esch seniester. Tgei tarlischur da diamants e marenghins! „Duess jeu arver la combra enamiez?“ Il buob ha ponderau ditg e liung. El veva denton aschi ina stoda marveglia, ch’el ha priu la clav dad aur ed ha aviert igl esch. Ed el ha viu l’entira bellezia dil mund. Mo tuttenina eis el vegnius tut freids. El saveva buc pli se muentar ed ei vegnius striunaus en in crap da granit ner.  Suenter biars onns ei il secund frar vegnius en survetsch tier la diala. El ha è survegniu las treis clavs. Mo era el haveva tontas marveglias, ch’el ha aviert la combra scumandada ed ei vegnius striunaus en in crap da granit verd.
Finalmein ei il frar giuven arrivaus el casti. El ha denton fatg per camond alla diala. „La combra enamiez vegnel jeu mai ad arver.“ En quei mument ei la diala cumparida. Ella ha mez il maun sil tgau dil buob ed el ha viu l’entira bellezia dil mund.  Silsuenter ha la diala spluntau cun ina torta sil crap da granit ner e sil crap verd. E tgei ei schabegiau? Ils dus frars ein puspei vegni en veta. La diala ha schenghegiau als frars ina massa custeivladads. Ils buobs han priu cumiau e detg: „Engraziel fetg buna diala.“
Els ein i giuado tras la porta dil casti ed han mirau anavos. „Mirei!“ Il casti marveglius era svanius. Ins veseva mo pli in grond grep ner.

Fassung Sandra Greta Blum, © Mutabor Märchenstiftung