sell-mä niä z'Stubädä gah, hets eister gheissä. Da chennt etz der Tristeler Hansi im Schachä-n-obä-n-äs Wort derzüe sägä. Der hed eis Summers i der Gisleralp obä diänet. Mal äu einisch dass z'altä Mittwuchä gsy ist, seid er am Abed, är gahi hinecht nu zum Tristeler Nänni hindärä. Diä andärä hend-ems gwerrt und gseit, är sell nytt gah, äs syg z'altä Mittwuchä. Är miäss gah, heig er gmeint und syg fort. Am neechstä Morged, wo sy ds Veh zämätribä heiget und heiget wellä mälchä, syg är nu niänä-n-ummä gsy. Und nytt chu und nytt chu bis gägä Mittag anä. Und da syg-är verhärdädä-n- und verdräckätä da-härä chu, eppis grüsigs! Sy heigädä düe ä chly üssglachet und üssgspillt: nächtig miäss ers doch scheen gha ha bim Nänni, das ers solang heig meegä biänem verlydä. Aber der Hansi heig ä kei bitz glachet. Ändlächä säg er, wennd sy wisstet was är, tätet-s'äu nytt lachä. Der ganz Summer üss heig-er-si niämeh meegä-n-erlachä und syg eisster tüssä gsy. Erscht am Herbst heig-ers düe verzellt, wiässem der sälb Abed ggangä sy. Wonner zvordrisch i ds Fäldmes hindärä chu syg, syg-em äs Wybervolch abchu und syg chu bis hert vornä züechä. Und syg hindernähär! Und vo da awägg heig är nymeh vonem sälber gwisst bis am Morget z'Bättälyt tä, und da syg är im Gergertall unnä-n-innärä Grotzä-n-obä ghanget. Das Wybervolch syg sy Müetter sälig gsy, wonem alligs gseit gha heig, z'altä Mittwuchä sell-er niä z'Stubädä gah.

Dom. Imhof, 55 Jahre alt, Spiringen

Quelle: Müller, Josef: Sagen aus Uri 1-3. Bd. 1-2 ed. Hanns Bächtold-Stäubli; Bd. 3 ed. Robert Wildhaber. Basel: G. Krebs, 1926, 1929, 1945

Eingelesen von der Mutabor Märchenstiftung auf www.maerchenstiftung.ch.