An enem Ort sii zwee Chnächta gsiin; si häin am gliiche Tisch ggässen und siin im gliichem Bett gschlaafen. Äinä ischd e chächa, rotbräächa Burscht gsiin und dr ander es grings Birschtelli, bläicha wee-n-es Äschetööch.

Äis es Tags hed dr Chäch mid dem Magerren afa z'Bode stellen, si siigen beed an dr gliiche Choscht, är siigi gsunda und nee abläässiga, und är, dr ander, gseeji drin, as wen er undrem Bode virhachäämmi old sooreti.

Är wissi's wol; är chenne-m-ma scho säge-w-warum; all Aben, wen er gööd d'Oige zöötaan häigi, chemi es Wiib und ghiji im es Roshälfterli uber ds Hoit; de siigi är es Ros; ds Wiib sitzi uf in embrüüf, und de jagi’s nen dee ganz Ncht umha bis am Morgen, uw wen är üüf,sa siigi är meeda und abgfätzta und schwitzi wee em Bär.

Dr ander hed nid vil drüüf gsäid; si wellen hina Platz tüüschen; är selli äis a d'Wand.

Des Abeds ischd das Wiib a-l-Lätza graaten. Äs ischd enumhi chun und hed dem Chnächt welle ds Hälfterli uber ds Hoit reerren. Aber jetz isch'sch am Lätze gsiin! Dr Chnächt hed ra ds Hälfterli us e Chnode gschrissen und re 's uber en Grind greerrd. Jetz ischd äs es Ros gsiin, und dr Chnächt ischd däm uf e-r-Rigg gsprungen und hed's dee ganz Nacht gjagd u gfitzd und hed im nid es Raschtli Rööww glaan.

Am Morgen ischd er uf em Ros häichun und hed's im Rosgaden abbunden. Derna hed er dem Mäischter und allen Deenschten greefd, är welle nen es Ros zäigen. Aber da ischd wäder Stil no Gäggi von enem Ros mee gsiin; an enem Hälfterli ischd d Mäischterfroww abbundni gsiin. Dee ischd drum e Häxefroww gsiin und hed niid Gschiiders gwissd z'töön, wan ander Liit z'plaagen.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.